|
mánudagur, desember 29, 2003
Hvað er annars málið með allan þennan snjó!!!! Bara allt komið á kaf og enn að snjóa. Ég var fullt á ferðinni í dag á milli búða að reyna að versla fyrir inneignarnóturnar og það hafðist að lokum. Ég skemmti mér bara vel í öllum snjónum og fann til með öllum hinum sem sátu fastir á götuhornum og bara hvar sem er þar sem safnaðist saman snjór. Aumingja Bjartur var í vinnunni í allan dag og komst ekkert út að möddast. Hann tók nú samt gleði sína þegar þessi litli trukkur sat fastur á Nýbýlaveginum og lokaði fyrir alla umferð. Hann flaug í rescue ham og skellti spotta í trukkinn og spólaði af stað, því miður gekk það ekki og var eiginlega bara fyndið þegar var orðið strekkt á spottanum og krúsi litli flaug til baka. Einhver sniðugur strákur kom með salt í poka og eftir smá stund þá komst hann af stað og hvarf í snjókomuna.
posted by Sibba at 8:30 e.h.
|
~|=|~
laugardagur, desember 27, 2003
Það var alveg hræðilega erfitt að vakna í morgun og ég var geyspandi alveg til hádegis. Ég mætti nú samt galvösk á Esso kl 7 í morgun og við héldum áleiðis að Langjökli. Skyggnið var nú ekki mikið og þegar við vorum komin upp á jökulinn var það orðið að engu og því ferðaáætluninni breytt. Í stað þess að fara að Þursaborgum fórum við í suðurátt og niður af jöklinum rétt vestan við Hlöðufell, ég hef ekki nennt að kíkja á kort og Dóri ekki með kort í bílnum svo ég veit ekki nákvæmlega hvar við vorum. Þetta var ofsalega gaman og allir skemmtu sér vel. Allt gekk vel þrátt fyrir að Dóri hafi affelgað eitt dekk, ég tek það á mig og Nóa konfektið =) Takk annars Dóri að nenna að hafa mig með, þú manst að þú átt enn eftir að botna vísuna hagmælti viskubrunnur =) Ég er svo búin að setja inn nokkrar myndir. Það greip mig eitthvað svart - hvítt æði svo að flestar myndirnar eru í svart - hvítu. Ég tók nú 75 myndir en nennti bara að setja 15 inn, það er ekki svo mikið pláss á þessu geymslusvæði þannig að ef einhver veit um stór frítt svæði þá endilega láta vita!!
posted by Sibba at 8:28 e.h.
|
~|=|~
föstudagur, desember 26, 2003
Við erum nú aldeilis búin að hafa það gott síðustu dagana. Jólasteikin tókst með afbrigðum vel á Aðfangadagskvöld og ekkert klikkaði. Meiraðsegja tókst okkur að búa til almennilega sósu sem hefur ekki tekist áður!!! Við fengum svo helling af pökkum að vanda og dunduðum okkur við að rífa þá upp. Svo er bara búið að sofa, borða og liggja í leti og bara njóta þess að gera ekki neitt. Við ætlum að elda kalkún í kvöld og hann er að þiðna í vaskinum, hann er nú í stærra lagi fyrir tvo greyið en hann verður bara borðaður kaldur næstu daga / vikur =)
Annars er stefnan að fara í jeppaferð í fyrramálið og kíkja á Langjökul í jólabúningi. Það á að hittast á Essó uppá Höfða kl 7 í fyrramálið, almáttugur hvað verður erfitt að vakna, ég sem er búin að sofa til hádegis síðustu dagana og haft það bara gott!!! Þetta verður örugglega voða skemmtileg ferð og það koma myndir inn fyrr en síðar =)
posted by Sibba at 3:00 e.h.
|
~|=|~
miðvikudagur, desember 24, 2003
Guð gefi ykkur öllum friðsæl og skemmtileg jól og megi gæfan fylgja ykkur á nýju ári.
posted by Sibba at 5:03 e.h.
|
~|=|~
þriðjudagur, desember 23, 2003
Þá er rúmur sólarhringur í á jólahátíðin hefjist. Fór í skötu til þeirra gömlu áðan, ég er ekki frá því að hún hafi verið með sterkara móti þetta árið því ég missti næstum andann þegar ég settist við matarborðið. En oní magann fór hún og bragðaðist bara ágætlega, ég fæ að minnsta kosti ekki kvef í bráð!! Svo lá leiðin í Nóatón þar sem jólasvínið var keypt og þar á eftir í bleika svínið, ég er ekkert smá sátt við hvað var lítið að gera í Bónus, það var ekkert meira af fólki en á venjulegum virkum degi. Að vísu var rjóminn búinn en það reddaðist í næstu búð. Þannig að jólaundirbúningurinn er allur að hafast þessi jólin, kortin til og allir pakkar líka svo nú er bara eftir að bregða sér í rauða gallann og keyra allt dótið út. Ég skellit í eina smákökusort í gærkveldi og hún bragðast alveg hreint með ágætum, ég ætla að láta þessa einu sort duga og borða bara þeim mun meira af smákökum frá mömmu og svo náttúrlega allt nammið =)
Annars sit ég bara í sófanum og er að hlusta á jólakveðjurnar á rúvinu. Mér finnst ekki koma jól nema borða skötu og hlusta svo á allar jólakveðjurnar. Það minnir mig alltaf á þegar ég var lítil og var að skreyta allt húsið heima þá ómuðu kveðjurnar um allt því amma var að hlusta og hún þekkti helling af fólki sem var að senda, gott ef hún sendi ekki líka kveðju en ég man það ekki. Annars eru nú alltaf einhverjir á Hrafnistu sem senda kveðju og ég tek þær að sjálfsögðu til mín.
Ætla að reyna að vera dugleg að taka til þar til ég sæki bóndann í vinnunna, sem btw á eftir að kaupa aðalpakkann!!!!!!!
posted by Sibba at 3:32 e.h.
|
~|=|~
mánudagur, desember 22, 2003
Bara komið fullt af snjó úti!!!! Í dag stefnir í hvít jól en það á víst að vera rok og rigning á morgun svo hver veit nema snjórinn verði allur farinn í fyrramálið.
Ég er búin að vera að þvælast um bæinn í dag og kaupa aðaljólagjöfina. Kíkti aðeins í Smáralindina og þar var alveg endalaust af fólki, samt ekki eins slæmt og á laugardaginn. Annars er ég búin að fara í bankann, pósthúsið og sitthvað fleira og aldrei eru nein bílastæði, þannig að ég er búin að nýta mér það óspart að vera á stórum bíl og leggja á ómerktum bílastæðum utan vegar, mömmu til alveg hreint ómældrar gleði. Gerði nú bara fyrir hana að leggja uppá snjóruðning fyrir utan húsið hjá þeim gömlu þannig að það yrði lægra fyrir hana að komast upp í bílinn en hún hélt nú ekki kellan =)
Við skelltum í jólaísinn í gær og Bjarturinn stóð sig bara nokkuð vel, er samt ekki frá því að það hafi farið eitthvað minna af Nóa Kroppi og rjóma í ísinn á til stóð, en mér var nær að láta hann sjá um þann hluta verksins!!! Það er svo stefnan að baka eitthvað úr eggjahvítunum sem urðu afgangs úr ísgerðinni en ég sé til með dugnaðinn í svoleiðis því ég nenni varla að baka ein þessi jólin. Svo á ég enn helling eftir í kirkjunni sem ég vil endilega klára fyrir jól svo ég hef nóg að gera, svo ég minnist nú ekki á 8 jólakort sem eru við það að verða tilbúin og 2 jólagjafir sem eru enn ekki komnar á borðið á verkstæði jólasveinsins :D Meira hvað þessi jólakort eru að standa í mér þessi jólin, eins og ég hef nú annars gaman að þessu dútli!!!
posted by Sibba at 4:24 e.h.
|
~|=|~
sunnudagur, desember 21, 2003
Við hittumst áðan nokkrar stelpur sem vorum saman í grunnskóla. Að þessu sinni hittumst við heima hjá Ernu og gúffuðum í okkur kræsingar sem við komum með. Þetta var alveg ofsalega gaman og verður endurtekið á nýju ári. Ég tók myndavélina með mér, að vísu var ég eitthvað að spara hana en afraksturinn má sjá hér
posted by Sibba at 8:47 e.h.
|
~|=|~
föstudagur, desember 19, 2003
Langar bara að taka það fram að Bjarturinn valdi Sveinka á bílnum, minn Sveinki ferðast að sjálfsögðu í sleða með hreindýrum.
posted by Sibba at 6:16 e.h.
|
~|=|~
Já hver hefði trúað því að ég væri loksins búin með verknámið!!! En svona er lífið. Við Hrefna og Ólöf kvöddum Fossvoginn í gær og héldum af því tilefni heljarins átveislu sem mikil ánægja var með. Við erum allar ofsalega sáttar við verknámstímabilið og hefðum ekki viljað byrja einhversstaðar annarsstaðar, ótrúlega gott fólk og allir almennilegir og yndælir.
Annars er jólaundirbúiningurinn á heimilinu bara í góðum gír, búið að kaupa næstum allar jólagjafir og búið að ákveða þær sem á eftir að kaupa. Búið að koma öllu dótinu austur í flutningabílinni svo þá er nú mikið frá. Annars tók ég slurk í jólakortunum og föndraði alveg slatta um daginn en er hins vegar ekki búin að skrifa á eitt einasta, þetta er allt að koma. Stefni á að gera jólaísinn á morgun ef ég nenni að ná í hrærivélina hjá múttu.
Idol kvöld í kvöld, mér fannst allir standa sig ofsalega vel síðast en Rannveig einna síst svo það kom mér ekki á óvart að hún skyldi detta út. Mér fannst hún syngja voða vel en ekki vera með fallega rödd. Mér fannst Jón, Kalli og Helgi bestir síðast. Það verður gaman að sjá hvernig þau eiga eftir að standa sig í Stuðmannalögunum!!!
posted by Sibba at 6:12 e.h.
|
~|=|~
laugardagur, desember 13, 2003
Svona í tilefni snjókomunnar er mynd dagsins af snjókalli, ekki það að þessi snjór eigi eftir að stoppa lengi við en það má skella í einn snjókall fyrir því. Ég er búin að eyða deginum heima hjá mömmu og pabba við að skera út og steikja laufabrauð, það eru engin jól án þess. Þetta var bara mjög góður dagur til að dunda sér við að skera út, hlusta á jólalögin í útvarpinu og kíkja á snjókomuna úti fyrir glugganum. Ég er byrjuð að mála kirkjuna en samt voða lítið af því mig vantaði pensla, ég næ nú samt alveg örugglega að klára hana fyrir jólin. Ég er samt ekki búin að vera alveg nógu dugleg í jólakortunum, er ekki búin að gera eitt einasta í þessari viku en ég er alveg að fara að verða dugleg. Við Bjartur ætluðum nú að baka eitthvað saman og já svo á ég alveg eftir að gera jólaísinn, humm það er greinilega nóg eftir að gera, verð að hætta að slæpast svona eftir vinnu :D
posted by Sibba at 4:05 e.h.
|
~|=|~
miðvikudagur, desember 10, 2003
Ég kíkti með mömmu og pabba í Keramikbúðina í Kópavogi áðan, fann þessa líka fallegu kirkju sem þau gáfu mér í fyrirframjólagjöf. Er farin að hlakka til að byrja að dunda mér við að mála hana, verður gaman að gera loksins jóladót fyrir sjálfa sig en ekki í stressi til að gefa í jólagjöf. Bjarturinn verður á fullu að gera við næstu kvöld svo hann er glaður að ég hef eitthvað til að dunda mér en ekki að pirrast á fjarveru hans. Ætla að dunda mér í kvöld að tína uppúr jólakassanum og raða upp jóladóti, við eigum fullan innkaupapoka af jólasveinum sem þurfa að fara að vakna af dvalanum og koma með jólastemningu á heimilið. Svo er alveg nauðsynlegt að föndra nokkur kort svo það klárist nú fyrr en síðar, þarf að fara að senda þau sem fara út í heim.
posted by Sibba at 5:13 e.h.
|
~|=|~
þriðjudagur, desember 09, 2003
Þá styttist enn í jólin, bara nokkrir dagar eftir. Við helltum okkur í smá jólafíling áðan og settum upp jólaseríu í eldhúsgluggann og jólagluggatjöldin, svo settum við líka seríu í stofugluggann en við settum hana bara í gluggakistuna og það kemur bara mjög vel út. Við setjum svo grenið og seríuna á svalahandriðið fljótlega, samt svo leiðinlegt að vera að setja seríu út og það bara rignir, vantar alveg snjóinn til að fullkomna allt. Var að hugsa þegar ég labbaði heim í dag að mér finnst svo lítið búið að skreita, ekki svo margir búnir að setja upp jólaseríur í gluggana og trén. Það er kannski bara fólkið í Fossvoginum sem er ekki duglegt við að skreyta, aðalega þau hús sem ég er að horfa á.
Nú eru bara 7 dagar eftir í verknáminu, æ það verður nú óskup ljúft að komast í jólafrí og útúr spítalalífinu. Ég er eiginlega alveg búin að ákveða að spítalalífið er ekki alveg að henta mér, svo ópersónuleg færibandavinna og ég er ekkert fyrir svoleiss. Verður gaman að kynnast fleiri stöðum í verknámi og sjá hvernig lífið er á öðrum stöðum.
posted by Sibba at 9:35 e.h.
|
~|=|~
fimmtudagur, desember 04, 2003
Jæja þá er maður smátt og smátt að komast í jólagírinn. Ég dett inn í jólaskapið af og til en það bara hverfur strax aftur, grunar að það sé bæði vegna snjó og prófleysis. Það er svo gaman þegar maður á að vera að lesa fyrir próf að dunda sér í jóladótinu að föndra og skreyta, plana kökubaksturinn og þrifin og allt sem jólunum fylgir. Við erum svona smá saman að fá hugmyndir að jólagjöfum, hvað við ætlum að búa til sjálf og hvað þarf að kaupa. Það er samt alltaf sama fólkið sem maður er í vandræðum með og er alltaf á seinustu stundu að reyna að finna eitthvað sniðugt, ætlum að reyna að sleppa við það stress þessi jólin svo sem eins og öll hin líka!! Sá í fréttabrefi frá Hjallakirkju að það verða aðventutónleikar þar eitthvert sunnudagskvöldið, er að spá að reyna draga kallinn með mér á þá. Held að Lára sé að syngja þetta kvöld svo það verður fínt aðeins að hitta á hana og hlusta á jólalög.
Við í bekknum verðum með bás í Kolaportinu á laugardaginn að selja dót til að safna fyrir útskriftarferðinni. Það gekk svo glimrandi vel síðast að við ákváðum að gera þetta aftur, alveg ótrúlegt hvað fólk er að kaupa þarna. Þannig að ef einhver vill losna við dót úr geymslunni sinni þá bara hóa í mig á morgun föstudag og ég kem og hirði dótið.
posted by Sibba at 9:20 e.h.
|
~|=|~
mánudagur, desember 01, 2003
Þegar við Bjarturinn vorum að skoða myndirnar í gærkveldi þá fór um hann hrollur þegar hann sá myndirnar frá því þegar Flubbi, Krílið og Pajero fóru í gegnum ísinn, fékk alveg flashback frá því hann og Steini voru í krapaferðinni skemmtilegu á Kjalveginum um síðustu páska =) Þetta var að rifjast upp fyrir mér núna.
posted by Sibba at 2:36 e.h.
|
~|=|~
Jeppaferðin um helgina var alveg rosalega skemmtileg, ég er búin að setja inn nokkrar myndir og það má skoða þær hér. Við lögðum af stað uppúr 7 á föstudagskvöldið, hópurinn hittist á Esso Ártúnshöfða og ók sem leið lá upp að Geysi þar sem fyllt var á tankana. Þaðan var haldið uppá Kjöl, það var nú frekar lítið um snjó en samt búið að skafa aðeins í skafla. Við vorum svo komin að Kerlingafjöllum eitthvað milli 12 og 1, þá var hópurinn aðeins farinn að dragast í sundur því einhverjir voru búinir að skera dekk og affelga. Veðrið var bara fínt þrátt fyrir svolítinn vind og frost. Færðin fór svo versnandi eftir því sem nær dró Setrinu, það var ekki svo mikill snjór en hann var alveg hræðilega leiðinlegur. Tíminn leið og við vorum ekki komin að skálanum fyrr en 7 um morguninn, þá vorum við nú orðin frekar þreytt og konan búin að dotta í nokkrar mínútur á leiðinni og Bjarturinn dottaði víst líka við stýrið (á ferð að sögn). Þegar við svo komum að skálanum þá var enginn með lykil að svefnskálanum eða ljósavélinni svo það var farið aftur út í bíl og sofið þar til kl 8:30 þegar 3 af 4 fararstjórum komu og einn af þeim var með lykil. Skemmtileg tilviljun að 3 af 4 síðustu bílunum voru fararstjórabílar og þeir komu 1 1/2 klukkutíma á eftir öðrum. Þannig að við komumst ekki í rúm til að sofa fyrr en um 9 á laugardagsmorguninn og var sofið til kl 1. Þá var farið út að keyra í ca 6 klst og umhverfið skoðað í fínu veðri. Sú ferð gekk bara vel fyrir utan 3 bíla sem fóru með nokkur hjól í gegnum ís en það gekk vel að ná þeim upp og ekkert skemmdist. Um kvöldið var svo grillað rosagott lambakjöt og bara spjallað, sungið og skemmt sér. Við Bjarturinn vorum nú samt frekar þreytt og farin að sofa uppúr 10. Ég hef sjaldan þakkað jafnmikið fyrir að hafa skólabækur með mér því ég var með eyrnatappa í pennaveskinu, það var hrotið svo hrikalega í svefnskálanum að það var eins og það væru 15 traktorar á svæðinu!!! Gaman að því. Það var svo lagt af stað í bæinn um 11:30 á sunnudeginum, það var ekki þorandi að leggja seinna af stað ef heimferðin tæki 12 tíma eins og ferðin uppeftir. Veðrið var alveg geggjað og útsýnið ofsalega fallegt, heimferðin gekk svo bara mjög vel og við komin heim um 10 leytið. Stoppuðum í smá stund á Selfossi og nokkrir fóru á KFC, það tók svo smá tíma að laga dekkið hjá Geira og Magga og endaði með því að rífa þurfti dekkið af felgunni og laga það, við Bjarturinn stungum þá af frá Selfossi um 9 en þeir voru ekki komnir í bæinn um 1 um nóttina. Þessi ferðasaga er nú alveg hræðileg upptalning og örugglega leiðinleg að lesa en myndirnar eru miklu skemmtilegri. Þessi ferð var alveg meiriháttar skemmtileg og félagsskapurinn góður og allir vinir og hjálpuðu hvor öðrum. Hefði alveg verið til í að vera lengur og er strax farin að hlakka til næstu ferðar. =)
posted by Sibba at 1:02 e.h.
|
~|=|~
|
